काठमाडौँ।
नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ले नेपाल विद्युत प्राधिकरणका पूर्वकार्यकारी निर्देशक कुलमान घिसिङप्रति चर्को आक्रोश व्यक्त गरेका छन् । उनले घिसिङलाई 'बैगुनी' को संज्ञा दिँदै लोडसेडिङ अन्त्यको श्रेय एक्लै लिन खोजेको आरोप लगाएका हुन् ।
शनिबार वीरेन्द्रनगरमा आयोजित एकता सन्देश सभालाई सम्बोधन गर्दै प्रचण्डले आफ्नो दोस्रो प्रधानमन्त्रीत्वकालमा सरकारले नै लोडसेडिङमुक्त नेपाल बनाउने ऐतिहासिक निर्णय लिएको दाबी गरे ।
कुलमान घिसिङप्रति आक्रामक हुँदै उनले भने, "अहिले कुलमान घिसिङले कुन विष खाएर, जुन थालमा खायो त्यसैमा प्वाल पार्न खोजिरहेका छन् । तिनले त्यसो नगरून्, बुद्धि फिरोस् भन्न चाहन्छु ।"
प्रचण्डले घिसिङलाई प्राधिकरणमा दुई-दुई पटक आफूले नै नियुक्त गरेको स्मरण गराउँदै अहिले सबै बिर्सेर बोल्नु लाजमर्दो भएको टिप्पणी गरे । "यस्तो बैगुनी भएर तिनले पार पाउने छैनन् । नेपाली जनताले पनि यस्तो व्यवहारलाई धेरै माफी दिने छैनन्," उनले चेतावनी दिँदै भने ।