काठमाडौँ
सङ्घीय संसद सचिवालयका नवनियुक्त सचिव प्रकाश अधिकारीले बिहीबार पद तथा गोपनीयताको शपथ ग्रहण गरेका छन्। सिंहदरवारस्थित संसद सचिवालयमा आयोजित विशेष समारोहमा उनले प्रतिनिधि सभाका सचिवका रूपमा शपथ लिएका हुन्।
अधिकारीलाई सभामुख डोल प्रसाद अर्यालले शपथ ग्रहण गराएका थिए। राष्ट्रपति रामचन्द्र पौडेलले सभामुख अर्यालको सिफारिसमा अधिकारीलाई प्रतिनिधि सभाको सचिव पदमा नियुक्त गरेका हुन्।
सङ्खुवासभाको खाँदबारी नगरपालिका–३ का स्थायी बासिन्दा अधिकारी निजामती सेवाको उपसचिव पदबाट सेवानिवृत्त कर्मचारी हुन्। यसअघि सभामुख अर्यालले हर्कराज राईलाई सचिव पदबाट मुक्त गर्दै रिक्त रहेको स्थानमा अधिकारीको नाम सिफारिस गरेका थिए।
संवैधानिक तथा कानुनी व्यवस्थाअनुसार सङ्घीय संसदका महासचिव, प्रतिनिधि सभाका सचिव र राष्ट्रिय सभाका सचिवलाई सम्बन्धित सदनका सभामुख वा अध्यक्षको सिफारिसमा राष्ट्रपतिले नियुक्त तथा पदमुक्त गर्ने प्रावधान रहेको छ।