काठमाडौँ ।
नेपाल विद्युत प्राधिकरणले आज (शनिबार) काठमाडौंका विभिन्न स्थानमा दुई घण्टा बिजुली कटौती गर्ने भएको छ । प्राधिकरणका अनुसार, पानीपोखरी र हस्पिटल फिडर अन्तर्गतका क्षेत्रमा बिहान ११ बजेदेखि दिउँसो १ बजेसम्म विद्युत् आपूर्ति बन्द हुनेछ ।
विद्युत् कटौती हुने क्षेत्रहरूमा लाजिम्पाट, पानीपोखरी, महाराजगञ्ज, त्रिभुवन विश्वविद्यालय शिक्षण अस्पताल, राष्ट्रपति भवन, नेपाल प्रहरीको केन्द्रीय अनुसन्धान ब्युरो (सीआईबी) र नेपाल प्रहरी अस्पताल आसपासका क्षेत्रहरू रहेका छन् ।
वितरण प्रणालीलाई भूमिगत गर्ने कार्य अन्तर्गत भूमिगत केबल जोड्नका लागि बिजुली काट्न लागिएको प्राधिकरणले जनाएको छ ।
तोकिएको काम समयअगावै सकिएमा निर्धारित समयभन्दा पहिले नै विद्युत् आपूर्ति सुचारु हुन सक्ने प्राधिकरणले सूचनामार्फत जानकारी दिएको छ ।