काठमाडौँ ।
नाइजेरियाको नाइजर राज्यस्थित एक बोर्डिङ स्कुलबाट गत महिना अपहरणमा परेका सबै बालबालिकाहरू सुरक्षित रूपमा मुक्त भएका छन् । नाइजेरियाली सरकारले थप १३० जना बालबालिका मुक्त भएसँगै अपहरणमा परेका सबै जना घर फर्किएको पुष्टि गरेको हो ।
यसअघि यही महिनाको सुरुमा १०० जना बालबालिका रिहा भएका थिए । सेन्ट मेरीज क्याथोलिक बोर्डिङ स्कुलबाट अपहरणमा परेका बालबालिकाहरूको यकिन संख्या सुरुमा स्पष्ट नभए पनि अन्ततः सबै जना मुक्त भएको अल जजिराले जनाएको छ ।
अपहरण कसले गर्यो र उनीहरूको रिहाइ कसरी सम्भव भयो भन्नेबारे विस्तृत विवरण सार्वजनिक गरिएको छैन । नाइजेरियामा फिरौतीका लागि संगठित आपराधिक समूहहरूले विद्यालयबाट बालबालिकाहरूको सामूहिक अपहरण गर्ने घटना बढ्दै गएको छ ।
मुक्त भएका बालबालिकाहरूको पहिचान र स्वास्थ्य परीक्षणको तयारी भइरहेको बताइएको छ ।